اسلام آباد۔19جولائی (اے پی پی):وزیر خارجہ مخدوم شاہ محمود قریشی سنوار کوں افغان ہم منصب محمد حنیف آتمردے نال ٹیلیفونک رابطہ کیتے۔ݙوہیں وزرائے خارجہ وچال ݙو طرفہ امور تے ڳال مہاڑ تھئی ۔دفتر خارجہ موجب وزیر خارجہ مخدوم شاہ محمود قریشی اپݨے افغان ہم منصب کوں 16 جولائی 2021 کوں تھیوم آلے واقعہ تے قانون نافذ کرݨ آلے اداریں ولوں ہݨ تئیں چاتے ڳئے اقدامات بارے ݙسایا ۔وزیر خارجہ افغان وزیر خارجہ کوں یقین ݙیوائے جو حکومت پاکستان ملزمان دی وختی گرفتاری اتے انہاں کوں انصاف دی کچاری اچ گھن آوݨ کیتے ہرممکن قدم چیسی وزارت خارجہ مروجہ سفارتی روایات توں بخوبی آگاہ اے۔ شاہ محمود قریشی آکھیے جو پاکستان اچ قائم، افغان سفارتخانے اتے قونصلیٹ دی سیکورٹی اچ مزید ودھارا کرݙتا ڳئے ،اساکوں توقع اے جو افغان حکومت، پاکستان ولوں کیتی ونڄݨ آلی سنجیدہ کاوشاں کوں پیش نظر رکھیندے ہوئیں ، افغان سفیر اتے سینئر سفارتکاراں کوں پاکستان توں واپس سݙݨ دے فیسلے تے نظر ثانی کریسی ۔افغان وزیر خارجہ محمد حنیف آتمر ایں واقعہ دی تحقیقات اچ ذاتی دلچسپی گھنݨ تے وزیر اعظم عمران خان دا شکریہ ادا کیتا تے افغان سفارت خانے اتے قونصلیٹ دی سیکورٹی ودھاوݨ دے حوالے نال وزیر خارجہ مخدوم شاہ محمود قریشی دیاں کوششاں دی تعریف کیتی ۔افغان وزیر خارجہ آکھیے جو افغانستان، پاکستان دے نال ݙو طرفہ تعلقات کوں خصوصی اہمیت ݙیندے اتے ایندے استحکام کیتے پرعزم اے۔
