اسلام آباد۔30اپریل(اے پی پی)نائب وزیراعظم اتے وزیر خارجہ اسحاق ڈار پہلگام واقعے دی مذمت کریندے آکھیے جو پاکستان دا پہلگام واقعے نال کوئی تعلق نئیں، بھارت پہلگام حملے دے فوری بعد پاکستان تے بغیر کہیں شواہد دے الزامات لائن اتے غیرذمہ دارانہ رویہ ݙکھائے، پاکستان ہر سطح تے دہشت گردی دی مذمت کریندے اتے پاکستان اتے ٻھارت وچال تصادم روکݨ کیتے عالمی برادری نال رابطے اچ ہیں، جنگ اچ پہل نا کریسوں ڄیکر بھارتی مہم جوئی کیتی تاں تکڑا ولدا ݙیسوں، پاک فوج کہیں وی جارحیت نال نمٹݨ کیتے بالکل تیار اے۔ ڈی جی آئی ایس پی آر لیفٹیننٹ جنرل احمد شریف نال مشترکہ پریس کانفرنس کریندے نائب وزیراعظم اتے وزیر خارجہ اسحاق ڈار آکھیے جو پریس کانفرنس دا مقصد موجودہ صورتحال ݙساوݨ اے، پاکستان ہر سطح تے دہشت گردی دی مذمت کریندے، معصوم شہریاں دا قتل قابل مذمت اے، واقعہ اچ مرݨ آلے لوکاں نال ہمدردی اے ٻھل پہلگام واقعے دے بعد بھارت غیرذمہ دارانہ رویہ ݙکھائے۔ انہاں آکھیا جو ساݙا قرآن مجید سکھیندے جو ہک انسان دا قتل پوری انسانیت دا قتل اے، معصوم شہریاں دا قتل کہیں صورت قابل قبول نئیں، پورا خطہ امن دے حوالے نال خطرے اچ اے، پاکستان دہشت گردی دی جنگ اچ سب توں ودھ قربانیاں ݙتن، بھارت کݙاھیں وی دہشت گردی دی مذمت نئیں کیتی۔ انہاں آکھیا جو بھارت دے غیر قانونی اتے غیر سنجیدہ بیانات نال صورتحال خراب تھئی اے، دہشت گردی مکاوݨ کیتے پاکستان عالمی برادری نال رل تے کم کیتے، بھارت پاکستان سودھا مختلف ملکاں اچ دہشت گردی اچ ملوث اے، دہشت گردی نال پاکستان بھاری جانی ومالی نقصان چاتے، انہاں آکھیا جو ساری صورتحال تے مختلف ملکاں دے رہنماواں نال خطے دی صورتحال تے الائے، ݙوہاں ملکاں وچال تصادم روکݨ کیتے عالمی برادری نال رابطے اچ ہیں، عالمی برادری ایں معاملے تے پاکستان دے موقف دی حمایت کیتی اے کیوں جو دہشتگردی دے متاثرین دا ݙکھ پاکستان توں بہترکوئی نئیں ڄاݨدا، پاکستانی قوم اتے اداریاں دہشت گردی دا جوانمردی نال مقابلہ کیتے، دہشت گردی دے ہر واقعہ تے الزام تراشی بھارت دا وطیرہ اے۔ انہاں آکھیا جو بھارتی حکومت ہمیشہ مذموم سیاسی مقاصد کیتے اینڄھے واقعات کوں استعمال کریندی اے اتے اپݨیاں ناکامیاں توں توجہ ہٹاوݨ کیتے مختلف ہتھکنڈے استعمال کریندی اے، بھارت مقبوضہ کشمیر اچ آزادی دی تحریک کوں دہشت گردی نال ڄوڑݨ چاہندی اے۔ نائب وزیر اعظم و وزیر خارجہ آکھیے جو بھارت مقبوضہ کشمیر اچ مسلسل انسانی حقوق دی خلاف ورزی کریندا پئے، بھارت اپݨے مسائل حل کرݨ دی بجائے الزامات ٻنھاں ملکاں تے لیندا پئے، مقبوضہ کشمیر دے عوام دے حقوق کچلݨ کیتے بھارت کالے قوانین دا سہارا ڳھدے۔ اسحاق ڈار آکھیا جو اقوام متحدہ دی قرارداداں اچ کشمیر کوں متنازعہ علاقہ منیا ڳئے، ڄیکر بھارت پاݨی روکݨ دی کوشش کیتی تاں اے جنگ تصور تھیسی، پانی پاکستانی عوام دی لائف لائن اے، بھارت سندھ طاس معاہدہ مؤخر کرتے عالمی قوانین دی خلاف ورزی کیتی۔ انہاں آکھیا جیکر بھارت کوئی حرکت کیتی تاں بھرپور جواب ݙتا ویسی، اساں جنگ اچ پہل نا کریسوں ٻھل بھارت مہم جوئی کیتی تاں ساݙا ولدا ٻہوں سخت ہوسی۔ انہاں آکھیا جو بھارت اچ مسلماناں اتےکشمیریاں دے خلاف مذموم مہم جاری اے، بھارت خطے اچ دہشت گردی اتے انتہا پسندی کوں ہوا ݙیندا پئے۔ نائب وزیراعظم و وزیر خزانہ آکھیا جو وزیر اعظم محمد شہباز شریف پہلگام واقعہ دی غیرجانبدارانہ اتے شفاف تحقیقات اچ تعاون دی پیشکش کیتی اے، اے غور کرݨا ہوسی جو بھارت اے مہم جوئی کیوں کیتی اے اتے ایندے مقاصد کیا ہین۔ چھیکڑ تے سوالاں دا ولدا ݙیندے اسحاق ڈار آکھیا جو مستند اطلاعات ہین جو آندے 36 ڳھنٹے ٻہوں اہم ہین، اساں پہلگام فالس فلیگ بارے سارے شکوک و شبہات اتے تحفظات سامݨے رکھ ݙتن، بھارت دے اندرو وی ایندے تے آوازاں اٹھدیاں پین، ڄیکر بھارت کوئی ڄارحیت ݙکھائی تاں ایندے کیتے اساں بالکل تیار ہیں۔ انہاں آکھیا جو پاکستان دے سفارتی عملے نال بھارت دی بدسلوکی دا معاملہ ہر عالمی فورم تے چیسوں۔ جوہری ہتھیاراں دے ممکنہ استعمال دے خطرے بارے سوال دا ولدا ݙیندے اسحاق ڈار آکھیا جو ݙوہیں ملک جوہری طاقتاں ہین، اینڄھے کہیں وی فیصلے دا اختیار نیشنل کمانڈ اتے کنٹرول اتھارٹی دا اختیار اے کیوں جو اے ہک حساس معاملہ اے اتے ایں بارے کڄھ وی نئیں آکھیا ونڄ سڳدا۔
