اسلام آباد۔10اگست (اے پی پی) وزیراعظم محمد شہباز شریف ڈاکٹر رُتھ فائو دے ورھیݨے دے موقع تے انہاں کوں خراجِ عقیدت پیش کریندیں آکھیے جو ڈاکٹر رُتھ فاؤ آپݨی زندگی دا ہر لمحہ پاکستان دے غریب اتے محروم طبقیں دی خدمت اچ گزاریا۔انہاں جذبہ ایثار، بے لوث محبت اتے خدمتِ خلق دی ہک ایجھی مثال قائم کیتی جیڑھی ہمیشہ یاد رکھی ویسی۔ وزیراعظم دفتر دے میڈیا ونگ توں جاری بیان اچ وزیراعظم آکھیا جو جذام دے مریضاں دے علاج اتے انہاں کوں معاشرے اچ باعزت مقام ݙیواوݨ کیتے ڈاکٹر رُتھ فاؤ دیاں انتھک کوششاں اساݙی قومی تاریخ دا روشن باب ہن۔قوم انہاں دیاں خدمتاں کوں ہمیشہ ماݨ دے نال یاد رکھیسی، ڈاکٹر رتھ فاؤ دا مشن اساݙے کیتے خدمت، ہمدردی اتے انسانیت دا پیغام اے۔
